Leikskólinn Drafnarsteinn - Drafnarborg - Dvergasteinn

Leikskólinn Drafnarborg tók til starfa 13. október 1950 og er fyrsti leikskólinn sem opnaður er í húsnæði sem byggt er sérstaklega sem leikskóli. Arkitekt hússins var Þór Sandholt og rekstararaðili í upphafi var Barnavinafélagið Sumargjöf eða til 1987 þegar Reykjavíkurborg tók við.

Drafnarborg var í byrjun þriggja deilda leikskóli með börnum í hálfsdagsvistun. Árið 1995 var byggt við húsið og það endurskipulagt. Fyrirkomulagi breytt og leikskólinn eftir það þriggja deilda með blandaðri vistun. Fyrsta forstöðukonan (leikskólastjóri) var Bryndís Zoëga og gegndi hún því starfi til 1991 eða í 41 ár. Bryndís var fyrst íslendinga til að nema leikskólakennarafræði en hún útskrifaðist frá Fröbel Höjskole í Kaupmannahöfn árið 1936.

Leikskólinn Dvergasteinn tók til starfa haustið 1998 sem tveggja deilda leikskóli. Haustið 2002 var leikskólinn stækkaður um eina deild sem tengd er saman við hinar með millibyggingu. Hönnuður leikskólans er Albína Thordarson, arkitekt. Vorið 2007 fékk leikskólinn Hvatningarverðlaun Leikskólaráðs Reykjavíkurborgar. Haustið 2011 var húsi bætt við lóðina sem fjórðu deildinni.

Árið 2011 voru leikskólarnir Drafnarborg og Dvergasteinn sameinaðir í einn rekstur og undir eina stjórn. Leikskólinn er því sex deilda og í þremur húsum með 122 börnum samtímis.

Drafnaborg er á Drafnarstíg 4 og Dvergasteinn er á Seljavegi 12.