Bolli Héðinsson

Bolli Héðinsson fæddist 5. febrúar 1954 á Landspítalanum og bjuggu foreldrar hans og eldri systir þá á jarðhæð Þórsgötu 27 í Reykjavík. Fjölskyldan flutti þremur árum síðar í Skaftahlíð 12 og enn síðar inn í Foss­vogs­hverfi að Kjalarlandi 20. BH lauk landsprófi við Gagnfræðaskóla Austurbæjar vorið 1970. Hóf svo nám í Menntaskólanum við Hamra­­hlíð um haustið og brautskráðist þaðan vorið 1974 „þjóðhátíðar­vorið“ sem svo má nefna vegna 1100 ára afmælis Íslands­­­byggðar en afmælið og hátíðahöld í tilefni af því settu mjög svip á þjóðlífið þetta vor og sumar. Ár­gangur­inn frá vorinu 1974 var síðasti árgangurinn sem útskrifaðist frá MH úr hefð­bundnu bekkja­kerfi.

BH tók virkan þátt í félagslífi skólans fyrst í leiklistarfélaginu svo sem ritari nemendafélagsins og á síðasta ári sínu sem forseti nemendafélagsins. Hann geymdi ýmiss gögn sem á fjörur hans rak auk þess sem hann stóð fyrir útgáfu margra þeirra, s.s. skólablaðsins, síma­skrárinnar („Skarmúss“), kynningar­rita („Pésa“) o.fl. Einnig geymdi hann gögn sem bárust frá öðrum skólum. BH stóð fyrir því að krepptur hnefi yrði merki nemendafélagsins NFMH og fékk hann Halldór Gíslason (síðar arkitekt, út­skrif­aðan frá MH 1972) til að teikna merkið.

Eftir útskrift hefur BH haldið utan um útskriftarárgang sinn úr skólanum staðið fyrir afmælissamkomum o.fl. Hann hafði forgöngu um að stofnaður yrði sjóður með skipulagsskrá sem hann gaf nafnið „Beneventum­sjóður“ sem er hugsaður fyrir afmælisárganga og aðra sem vilja gefa skólanum fjármuni sem nýst geta til að prýða skólann á þann máta sem fjárveitingavaldið telur ekki í sínum verkahring. Hefur BH séð til þess að stúdentar vorsins 1974 frá MH hafa gefið álitlega upphæð í sjóðinn á fimm ára fresti allt frá því sjóðurinn var settur á laggirnar í tilefni af 20 ára stúdentsafmæli þeirra vorið 1994. Einnig gáfu þau í sjóðinn í tilefni 50 ára afmælis skólans í september 2016 en sú afmælishátíð var hvatinn að því að þessi skjöl voru tekin saman og færð Borgarskjalasafninu.

Formáli Bolli Héðinsson